Apreciabel Miembro di Prensa,
Adhunto un comunicado di prensa.
Masha danki pa e cooperacion.
Saludos cordial,
Gabinete AVP-Futuro [cid:image001.png@01DBC352.C02B9D60]
Prome Minister Mike Eman anuncia conmemoracion anual di 1 di juli como Dia di Emancipacion
Gobierno di Aruba a conmemora awe 162 aña di emancipacion cu un ceremonia oficial na Renaissance Festival Plaza. Durante e acto, Prome Minister Mike Eman a haci un yamado pa sigui recorda e historia di sclavitud como un parti importante di nos historia nacional y a anuncia diferente iniciativa pa mantene e memoria aki bibo pa futuro generacion.
E ceremonia a tuma luga na Renaissance Festival Plaza a conta cu presencia di Su Excelencia Gobernador Interino Agustin Vrolijk, conseho di minister, parlamentarionan y representante di diferente organisacion. A habri e mainta cu Jevione Besselink ta canta e himno di Aruba y diferente presentacionnan cultural, incluyendo un baile di Alydia Wever cu a finalisa ta canta “Cunucu di Seit”, un presentacion di Tambu door di rumannan Thiel y un presentacion di baile door di Pierangely Wever y Kevin Gumbs.
Den su discurso, Eman a enfatisa cu 1 di juli ta un momento pa reflexiona riba un capitulo penoso di nos pasado, pero tambe pa honra e resistencia y dignidad di esnan cu a biba den sclavitud. “Awe, 1 di juli, nos ta para keto pa nos historia, un historia penoso. Ta e momento pa nos recorda esaki, pa nos acepta cu den nos historia nos tabatin e pagina penoso aki.” Segun Prome Minister Eman, e conmemoracion ta un homenahe na e perseverancia di hendenan cu, a pesar di a biba bou di condicion inhumano, nunca a perde speransa. “Ta danki na nan perseverancia, na nan amor pa otro y na nan deseo di un mañan diferente cu finalmente e dia di libertad a yega.”
Durante su discurso, Eman a expresa reconocemento na Archivo Nacional di Aruba, Biblioteca Nacional di Aruba, UNESCO, UNOCA y tur e expertonan y e investigadornan cu durante varios aña a sigui traha pa preserva e historia di sclavitud. “E bukinan cu tabata cera den Archivo Nacional di Aruba, cubri cu stof di tempo, awe a wordo habri y poni accesibel pa henter nos comunidad.” E Prome Minister tambe a referi na e Carta Capriles di 1857, presenta diamars anochi durante apertura di e exposicion di Biblioteca Nacional, Archivo Nacional y UNESCO. Segun el, e documento ta confirma cu ainda prome cu abolicion di sclavitud tabatin Arubianonan cu a para contra maltrato y inhusticia. “E Carta Capriles ta mustra cu ainda den un epoca di sclavitud tabatin hende na Aruba cu a para pa dignidad y igualdad.”
1 di juli lo bira un dia di conmemoracion nacional anual
Un di e anuncio mas importante durante e ceremonia tabata cu Conseho di Minister a aproba unanimamente pa 1 di juli wordo conmemora tur aña oficialmente na Aruba. “Siman pasa, Conseho di Minister, unanimamente, a aproba cu e fecha aki di 1 di juli ta un dia nacional pa nos conmemora tur aña y pa nos para keto na e momento importante aki.” Segun Eman, e decision aki ta confirma cu e historia di sclavitud y emancipacion ta ocupa un luga permanente den historia nacional di Aruba.
Edificio monumental pa Archivo Nacional Aruba y un monumento pa conmemora emancipacion
Prome Minister Eman tambe a anuncia cu Gobierno ta trahando riba diferente iniciativa pa sigui preserva e historia di nos pasado colonial. E la menciona e cu lo construi un facilidad permanente pa Archivo Nacional Aruba den e tankinan di awa na Kibaima, unda varios documento historico lo wordo preserva pa futuro generacion. Ademas, el a anuncia cu Gobierno lo construi un estatua di un dama cu a lucha contra maltrato y contra violacion di derechonan humano. “E statua aki lo ta un simbolo permanente di curashi y di respet pa dignidad humano.” Segun Eman e monumento lo recorda futuro generacion cu libertad, igualdad y respet no por wordo considera algo evidente, sino cu mester wordo defende constantemente.
Na final di su discurso, Eman a adverti cu, a pesar di e progreso cu humanidad a haci, e balornan di dignidad humano ta sigui vulnerabel si sociedad no sigui cultiva nan. “Hopi biaha nos ta kere cu humanidad a laga barbaridad tras di dje. Pero nos ta mira con facil e humanidad por cay bek den e mesun historia scur.”
Un yamado pa tur ciudadano
“Ta nos tarea pa cultiva tur dia e balornan cu ta haci nos ser humano. Si nos no nutri nan, nos por perde nan hopi mas facil cu nos ta pensa. Ta nos tarea sigui cana e caminda di respet pa dignidad y amor pa nos prohimo.”
E ceremonia oficial a conclui cu diferente discurso y presentacion cultural, reafirmando e compromiso comparti pa sigui preserva e pasado di tempo di sclavitud y pasa e conocemento historico aki na futuro generacion.
Foto’s
